ROXAS CITY – Dakop ang driver sang colorum nga traysikol matapos nga nagpalagyo sa mga Traffic Auxilliaries sa Brgy. Banica sini nga syudad.
Ginkilala ang driver kay Agustin Brillo, residente sang Brgy. Bonga, banwa sang Panay.Sa interview sang Bombo Radyo kay Gonzalo ‘Butsoy’ Andrada Jr., Traffic Management Unit head , samtang nagapatigayon sang operasyon ang mga katapo sang TMU sa bahin sang Brgy. Banica, sang matalupangdan ang isa ka colorum nga traysikol nga madamo sang sakay nga pasahero nga hinali nagliko sa isa ka eskinita.
Gilayon nga ginlagas sang mga katapo sang TMU kaupod ang pulis, ang amo nga traysikol kag natigayon nga maabtan sa sulodlon nga bahin sang nasambit nga barangay.
Ginpahayag pa sang driver nga mga himata sini ang iya sakay, apang nag-aku ang mga sakay nga mga pasahero sila.
Sa karon, gin-release na ang driver matapos makabayad sang nagakaigo nga multa.
