ROXAS CITY – Nakalikaw kag wala ma-iguan sa dughan ang isa ka motorista matapos nga ginluthang ini sang isa ka driver sang motorsiklo, sa Sitio Asag, Barangay Lonoy, Sapian, Capiz, alas-10:35 kagab-i sang Domingo.
Ginkilala ang biktima kay Roblie Felizardo, 28-anyos.
Samtang ang suspek ang ginkilala kay John Matutina, sa legal nga pang-edaron kag lunsay mga residente sang nasambit nga barangay.
Sandig sa imbestigasyon sang katapo sang Sapian MPS, nga samtang ginasubay sang duha ka mga persona ang nasambit nga dalan sang nag-overtake ang biktima sa suspek.
Apang ginapahayag nga ginlagas ini sang suspek kag sang nalab-ot gilayon gintutukan sang armas-luthang sa iya dughan kag ginpalukpan, apang nakalikaw ang biktima rason nga napilasan ini sa iya nawala nga kamot.
Nakapalagyo ang suspek sa wala mahibaluan nga direksyon.
Ginalantaw nga kahulugbon ang motibo sa pagpangluthang bangud nahibaluan nga yara sa impluwensiya sang makahulubog nga ilimnon ang suspek.
