CUARTERO, CAPIZ – Willing nga magbulig ang driver sang salakyan nga aksidente nga nakabunggo sa motorsiklo nga ginasakyan sang mag-live-in partner sa banwa sang Cuartero.
Ini ang ginpahayag ni Cuartero PNP Chief PCAPT Alladen Talaban sang ma-interview sang Bombo Radyo.
Matandaan nga nag-angkon sang pilas sa magkatuhay nga parte sang lawas ang mag-live-in partner nga ginkilala nga sanday alyas Cris, driver sang motorsiklo nga residente sang Brgy. Lacaron, Dao, Capiz kag live-in partner sini nga si alyas Rez nga residente sang Brgy. Bolo, Roxas City samtang ginkilala naman ang driver sang salakyan nga aksidente nga nakabunggo nga si alyas Joe kag residente sang Brgy. 1, Roxas City.
Suno kay PCAPT Talaban, sa ila imbestigasyon gin-ako sang driver sang salakyan nga napiyongan ini samtang nagamaneho rason nga nagkadto ini sa pihak nga linya nga amu man ang rason sang aksidente nga pagbungguanay sa nasambit nga lugar.
Nagapabilin sa hospital ang mag-live-in partner samtang gin-release naman sa custody sang kapulisan ang driver sang salakyan matapos magtakop ang reglementary period of detention sini.
Panugyan naman ni Talaban sa mga motorista nga mag-doble halong agud malikawan ang kasubong nga insidente.
