PONTEVEDRA CAPIZ– Nagapabilin sa gihapon sa ospital ang driver sang tricycle kag sang motorsiklo nga nagbunggu-anay sa Barangay Malag-it, Pontevedra, Capiz.
Matandaan nga ang driver-suspek amo si alyas Nonoy, 47-anyos kag residente sang Barangay Bailan, Pontevedra Capiz, samtang ang ginbungguan naman amo si alyas Toto upod ang mga apat ka sakay sini nga lunsay residente sang banwa sang President Roxas.
Sa interview sang Bombo Radyo kay Police Captain Garry Diaz, Hepe sang Pontevedra Municipal Police Station, iya ginpahayag nga halin sa Barangay Malag-it, Pontevedra ang motorsiklo nga padulong kun tani sa Bailan sa amo man nga banwa sang natabo ang insidente.
Suno kay Diaz, madasig ang pagpadalagan sang driver-suspek kag ma-overtake kun tani sa motorsiklo apang naalangan ini rasun nga nabungguan sini ang sakay sang tricycle.
Dugang pa sini nga yara sa impluwensiya sang makahulubog nga ilimnon ang driver-suspek sang motorsiklo bangud halin ini sa KTV Bar sa Malag-it, Pontevedra.
Sa subong, padayon pa ang imbestigason sang mga kapulisan angut sa insidente.
