CUARTERO CAPIZ – Maswerte nga wala napuruhan kag minor lamang nga mga pilas ang naagum sang driver kag mga sakay sini matapos maglumpat sa uyapad ang ginsakyan nga truck sa Barangay Bitoon Ilawod, Cuartero Capiz.
Sa interview sang Bombo Radyo sa imbestigador sang Cuartero Police Station nga si Police Staff Sergeant Piniel Apaitan, ginpahayag sini nga ginkilala ang driver sang truck kay alyas Jud, 23-anyos ang edad, kag mga kaupdanan sini nga sanday alyas Jap-Jap, 21-anyos kag alyas Rome, 39-anyos lunsay mga residente sang Barangay Sambag, Jaro, Iloilo City.
Suno kay Apaitan, samtang ginasubay sang mga ini ang dalan nagikan sa banwa sang Cuartero kag padulong kun tani sa syudad sang Iloilo pag-abot sa lugar kung sa diin nagluntad ang insidente ginapahayag nga may nag-overtake nga salakyan kabangdanan agud magsaylo ini sa pihak nga linya sang dalan.
Apang bangud madanlog ang karsada aksidente ini nga nadulaan sang kontrol sa pagmaneho kabangdanan sang ila paglumpat sa uyapad.
Mahibaluan nga ang nasambit nga truck ang may dala nga mga frozen foods.
Samtang, nagpamalibad naman ang mga ini nga dal-on sa ospital.
