ROXAS CITY – Dakup ang 24-anyos nga drug personality sa ginkasa nga drug buybust operation sang mga katapu sang Station Drug Enforcement Team (SDET) sang Roxas City PNP sa Barangay Banica, Roxas City.
Ginkilala ang nadakpan kay Raniel Joshua Sultan sang Barangay Lawa-an, Roxas City.
Ginpahayag ni Police Lt. Col. Ricardo Jomuad Jr,.hepe sang Roxas City PNP nga duha ka semana nga monitoring ang ginpatigayon sang mga otoridad kay Sultan antes ang operasyon.
Makabig nga newly identified drug personality ang suspek apang yara ang pangalan ni Sultan sa directory of intelligence.
Narekober sa posisyon sang arestado ang 10 ka sachets sang ginapatihan shabu, cellphone, black pouch, motorsiklo nga ginagamit sa transaksyon kag P1,000 nga marked money.
Ginabulubanta nga nagabug-at sang duha ka gramo ang narekober nga shabu nga may market value nga nagalab-ot sa P25,000.
