ROXAS CITY – Arestado ang isa ka drug suspek sa ginkasa nga drug buybust operation sang Station Drug Enforcement Unit sang Roxas City Police Station sa Barangay Banica, Roxas City.
Ginkilala ang nadakpan kay Hanzon Angon, 40 anyos, residente sang San Roque Street, Barangay Inzo Arnaldo, sining siyudad.
Narekober kay Angon ang apat tanan ka sachets sang ginapatihan shabu, 500 pesos nga marked money, kag motorsiklo.
Suno kay Police Master Sergeant Ramil Arcangeles, tagpamaba sang Roxas City PNP, una na nga nadakpan ang suspek bangud man sa pagduso sang ilegal nga droga.
Apang sang nahilway ini, sa baylo nga magbag-o, liwat nga nagbalik sa iya ilegal nga buluhaton si Angon.
Gindugang pa ni Arcangeles, magluwas sa nagaduso, nagagamit man sang ilegal nga droga ang suspek kag kilala ini sa iya nga ilegal nga buluhaton sa ila barangay.
Suno pa kay Arcangeles nga nangin maid-id ang ila nga monitoring sa suspek sa sulod sang halos tatlo ka semana antes ini ginkasa ang operasyon.
Sa karon, nakahunong na sa karsel sang Roxas City Police Station ang suspek kag natalana nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
