ROXAS CITY – Ginklaro sang tagdumalahan sang Department of Social Welfare and Development, Region VI nga wala pa sang recruitment para sa makasulod sa programa nga Pantawid Pamilyang Pilipino Program (4Ps).
Ini ang ginpahayag ni Atty. May Rago-Castillo, tagpamaba sang DSWD-6, sang mainterview sang Bombo Radyo.
Suno diri, nga wala sang Membership Registration Form nga ginapasabtan ang ila ahensya, ilabi na nga wala nagapanukot sang bayad agud makasulod ukon mangin miyembro sang nasambit nga programa.
Aminado ang tagdumalahan sang DSWD-6 nga nakabaton na sila sang report may kaangtanan sa pagpalapta sang pormas ilabi na sa Capiz kag may ginhimo na sila nga tikang agud mapaimbestigahan ini.
Ginpahayag man sini nga wala pa sa karon sang recruitment sa 4P’s kag agud makasulod sa amu nga programa, nagakadapat nga yara ang mga ini sa listahan kag kuwalipikado sa pagsulundan sang programa.
Mensahe sini sa mga pumuluyo nga luyag mangin miyembro, nga tsekyaron sang maayo kun lehitimo ang programa nga pagasudlan kag likawan nga ipahayag ang detalye sang ila personal nga impormasyon agud malikawan nga ma-scam.
