ROXAS CITY – Ginpaathag sang DTI- Capiz nga indi sila makapasilabot sa pagpataas sa presyo sang mga kompaniya sa ila produkto nga softdrinks.
Ini matapos makabaton sila sang sulat gikan sa anonymous sender nga nagareklamo ukon nagapangayo sa ila sang bulig nga aksyunan ang nasambit nga isyu.
Sa interview sang Bombo Radyo kay Ms. Ken Queenie Cuñada, Provincial Director sang DTI- Capiz, ginpahayag sini nga gilayon man nila ginsabat ang sulat.
Suno sa iya, ginklaro niya sa tagreklamo nga ang softdrinks isa ka luxury product nga indi sakop sang ila ginamonitor kag ginaregulate nga mga produkto.
Basic necessities and prime commodities lamang ang sakop sang ila ahensya nga kinahanglan gid sa pang-adlaw-adlaw nga kabuhi sang tawo kapareho sang tubig.
Dugang pa ni Cuñada indi mahimo nga intrahan nila ang pagpataas sa presyo sang softdrinks bangud posible sila ang balikan sini, mahimo direkta nalang suno diri nga magreklamo ukon magpadala sang sulat sa kompaniya sang softdrinks.// Ginapahanumdom man sini sa mga konsumidor nga indi tanan nga produkto ang sakop sang DTI.
