Nagpasaka sang reklamo ang Department of Trade and Industry (DTI) batuk sa walo ka mga contractor-licensees nga naangot sa flood control projects corruption scandal.
Sa statement nga ginpaguwa sang DTI, nasaad nga pinaagi sa Executive Order No. 913 series of 1983 kag sang iban pa nga trade kag industry laws, ginapasakaan sang reklamo ang mga contractor bangud sa posible paglapas sa construction industry regulations bangud sa ginaalegar kaangtanan sang mga ini sa iregularidad sa flood control projects.
Ang mga contractor nga subject sang reklamo amo ang walo sa top 15 contractors nga nag-corner sang 20% sang P545 billion nga balor sang flood control contracts nga ginbuyagyag ni Presidente Ferdinand Marcos Jr. sang nagligad nga Agosto.
Ang ini nga mga contractor amo ang mga masunod;
- Legacy Construction Corporation
- Centerways Construction & Development Inc.
- .Alpha & Omega General Contractor & Development Corp.
- MG Samidan Construction
- L.R. Tiqui Builders Inc.
- QM Builders
- EGB Construction Corporation
- Hi-Tone Construction and Development Corporation
Ang mga reklamo batuk sa nasambit nga mga contractor ang gin-file sa Philippine Contractors Accreditation Board-Monitoring and Enforcement Division.
Pinaagi sa pagpasaka sang reklamo sang DTI, nagahatag ini sang kahigayunan sa ahensya nga maghimo na sang preventive actions lakip na ang pag-suspend sang mga lisensya sang contractor kag iban pa nga mga nagakaigo nga tikang samtang padayon ang imbestigasyon.
