ROXAS CITY – Indi mabatyagan sang mga driver sang pampubliko nga salakyan sa probinsya sang Capiz, ang igapatuman nga P1.00 nga dugang pamasahe sang Land Transportation Franchising and Regulatory Board (LTFRB).
Sa interview sang Bombo Radyo kay Mr. Joebert Carandang Presidente sang PISTON Capiz, ginpahayag sini nga ang dugang nga P1.00 sa pamasahe kaunon lamang sang nagapadayon nga pagsinaka sang produktong petrolyo.
Suno kay Carandang, apisar nga nagpasaka sa pagsuluktan sa plete ang mga driver indi sa gihapon madula nga makapanghakroy ang mga ini bangud terminal to terminal lamang ang ila nga pagbyahe.
Ang nasambit nga pagpasaka sang plete ang mangin epektibo sa Oktobre 8, 2023 Domingo nga adlaw.
Sa pihak sini, nagpalab-ot man sang pasalamat si Carandang sa pamunuan sang LTFRB bangud sa ginhatag nga pagpasaka sang dugang nga pamasahe.
Samtang, ginasuhestyon sa gihapon sini nga kun ginsuspende lamang ang excise tax sa produkto sang petrolyo dako pa kun tani ini suno diri nga bulig sa tanan nga mga operators kag drivers.
Mensahe ni Carandang sa tanan nga mga drivers, ipatuman sa gihapon ang 20% nga discount sa mga estudyante, senior citizen kag mga Person with Disability (PWD).
