ROXAS CITY – Na-infused ukon nasaylo na sa isa ka coronavirus disease (COVID-19) patient ang dugo sang isa ka (COVID-19) survivor nga nag-donate para sa Convalescent Plasma Therapy sa Philippine General Hospital.
Ini ang ginkompirma mismo ni Ian Ceasar Frias, 31 anyos kag seafarer sa virus hit-Japanese cruise ship M/V Diamond Princess.
Suno diri nga nasaylo na ang 500cc sang iya gin-donar nga dugo sa COVID-19 patient kag ginahulat na lamang ang mangin resulta sini.
Mahibaluan nga isa si Frias sa tatlo ka mga Filipino COVID-19 survivors nga nagsabat sa panawagan sang PGH agud mabuligan ang mga critically ill COVID-19 patients nga maka-recover sa nasambit nga balatian pinaagi sa nasambit nga therapy.
Ginpahayag pa ni Frias nga ang iya nga iloy ang nagtulod sa iya nga mag-donate sang dugo bangud nahangpan sini nga ang iya pagka-recover sa nasambit nga balatian ang patimaan man nga mangin instrument siya agud makabulig sa iban nga COVID-19 patients.
Nahibaluan nga sanday Frias kag duha pa ka mga COVID-19 survivors nga sanday Gale Arranz kag Kain Soriano ang nagkaisog nga mag-donate sang ila dugo bangud katuyuan sini nga makabulig sa mga frontliners nga nagtatap sa ila agud dalayon nga mag-ayo sa nasambit nga balatian.
