ROXAS CITY – Ginakabig nga ‘historic’ ukon makasaysayan sang Philippine Red Cross-Capiz Chapter ang nagtakop nga Dugong Bombo 2019 sang Bombo Radyo kag Star FM – Roxas.
Suno kay Mr. Ketch Armiza, Donor Recruitment and Reporting Officer, naglab-ot sa 631 tanan ang successful blood donors.
Ginpahayag sini nga ang 631 tanan ka mga successful blood donors ang nakatipon sang 283, 950 CC ukon 75 gallons sang dugo.
Mahibaluan nga nalampuwasan sini ang rekord nga nahimo sang nakaligad nga tuig.
Sa natipon nga dugo sa amo nga aktibidad, 163 diri ang Type A; 155 ang Type B; 262 ang Type O; kag 51 ang Type AB.
Ginpahayag pa sini nga 107 ka mga indibidwal pa ang nagpabutyag man sang interes nga maka-donar sang dugo apang na-defer bangud sa mataas nga blood pressure, malain ang pamatyag kag iban pa.
Nangin kabahin sang madinalag-on nga blood donors amo ang tuigan na nga mga grupo nga nagasuporta sa nasambit nga programa sang Bombo Radyo kaangay sang Philippine National Police (PNP), Armed Forces of the Philippines, Bureau of Fire Protection, Philippine Coast Guard, Bureau of Jail Management and Penology (BJMP), mga empleyado sang nagkalain-lain nga ahensiya sang gobyerno kag pribado nga sektor, mga socio-civic organizations, pamilya kag indibidwal.
