Patigayunon na subong nga adlaw ang “Dugong Bombo: A Little Pain, A Life to Gain” sang Bombo Radyo Philippines kaupod ang Bombo Radyo Philippines Foundation, Inc. kag ang Philippine Red Cross.
Ini ang pinakadaku nga single-day voluntary blood donation event sa pungsod nga ginahiwat sa 25 key areas kun sa diin naga-operate ang 32 fully digitalized AM kag FM stations sang Bombo Radyo Philippines.
Subong nga tuig, mas madalom ang kahulugan sang Dugong Bombo samtang nagapadayon ang pungsod sa pagbangon halin sa makamamatay nga mga bagyo kag mga makahalalit nga mga linog nga nagtay-og sa madamo nga mga rehiyon.
Ang mas nagataas nga pagkinahanglan sang bastante nga suplay sang dugo amo ang nagapakita sang importansya sang mga makatawo nga inisyatibo kaangay sang Dugong Bombo.
Sa bilog nga pungsod, linibo ka mga Pilipino, halin sa mga ahensya sang gobyerno, civic organizations, religious groups, eskwelahan, uniformed personnel, pribado nga kompanya, kag mga individual donors, ang liwat nga magapakita sang ila kaisog paagi sa pagpakig-upod sa sini nga buluhaton.
Magluwas diri, ang Catholic Bishops’ Conference of the Philippines (CBCP) naghatag sang ila bug-os nga suporta para sa sini nga tuigan nga bloodletting event.
Gina-engganyo sini ang mga tumuluo nga magbuylog sa Dugong Bombo bilang konkreto nga ekspresyon sang pagtuo kag paghatag sang bulig sa mga nagakinahanglan.
Sa sulod sang masobra duha na ka dekada, ang Dugong Bombo nangin salandigan sang mga blood bank, ospital, kag emergency response units, pinaagi sa paghatag sang linibo ka blood units nga nagasalbar sang madamo nga kabuhi kada tuig.
Ang tema nga “A Little Pain, A Life to Gain” nagapahanumdom nga bisan may gamay lang nga kasakit kag pila ka minutos lang ang kinahanglan sa pagdonar sang dugo, apang mahimo ini makaluwas sang kabuhi sang isa ka tawo nga yara sa peligro.
Bisan sang moderno nga teknolohiya, wala gihapon sang makabulos sa dugo sang tawo sa tion nga ini ang kinahanglanon.
Subong nga adlaw, sa pagpatigayon sang Dugong Bombo 2025 sang Bombo Radyo Philippines, kaupod ang Bombo Radyo Philippines Foundation, Inc. kag Philippine Red Cross, mas ginapabakod pa ang commitment sang network sa pagserbisyo sa publiko, pagbulig sa komunidad, kag pagluwas sang kabuhi sang mga Pilipino.
Diri sa area sang Capiz, kilit-anay kita sa Capiz State University Main Campus sa Fuentes Drive, Roxas City umpisa alas syete subong nga aga. Basta Radyo… BOMBO!
