Ginpermahan subong nga adlaw ni Presidente Ferdinand “Bongbong” Marcos Jr., ang duha ka bag-o nga layi duha ka adlaw antes ang State of the Nation Address ukon SONA.
Ini ang Republic Act No. 12009 ukon ang ‘New Government Procurement Act’ kag Republic Act No. 12010 ukon ang ‘Anti-Financial Account Scamming Act’ nga pareho nga priority bills sang Marcos administration.
Sa idalom sang Government Procurement Act, mas mangin madasig, episyente kag moderno na ang ginahimo nga procurement sang gobyerno.
Tinutuyo sang bag-o nga layi nga indi lamang makakuha ang gobyerno sang manubo nga balor sang mga ginabakal nga gamit kundi mapasiguro ang kalidad sang mga ginabakal sini.
Sa idalom naman sang Anti-Financial Account Scamming Act, mahatagan sang proteksiyon ang publiko kag financial institutions batuk sa cyber criminals.
Suno sa presidente, mas mabaskog kag mas mangin episyente ang biyurukrasya kasunod sang pagpirma sa duha ka bag-o nga layi.
