Ginhilway na sa karsel ang duha ka mga lalaki nga ginapahayag nagbaligya sang pinalukpan nga isda sa dulungkaan sa syudad sang Roxas, matapos makabayad sang P12,000.00 bilang piyansa.
Matandaan nga ang nasambit nga mga persona ang lunsay residente sang Balete, Aklan.
Sa interview sang Bombo Radyo sa Chief sang Capiz Maritime nga si PCPT. Semdan Sitchon, ginpahayag sini nga natigayon nga madakpan ang duha ka indibidwal pinaagi sa koordinasyon sang Maritime Carles Iloilo kun sa diin ginpahayag nga may nakasulod sa probinsya nga nagabaligya sang isda nga pinalukpan.
Suno kay Sitchon matapos mabaton ang amu nga report, gilayon nila ini nga ginpadulungan ang lugar agud magpatigayon sang inspection.
Dakop sa akto ang isa ka van nga may sulod nga 3 ka banyera sang nagkalain-lain nga isda kag ginapahayag nagikan pa sa Antique.
Dugang pa sang Chief nga sa ila ginpadala nga sample sa talatapan sang Bureau of Fishery and Aquatic Resources (BFAR) Lawaan, nakumpirmar nga positibo ini nga gingamitan sang illegal.
Panugyan sini sa mga konsumedor nga masami nagabakal sang mga isda, itsekyar sang maayo ang baklon agud malikawan ang indi maayo nga epekto sa ikaayong lawas.
