Ginbalik na sa kalalawran sa tunga sang Barangay Agoho, Panay kag Barangay Punta Cogon ang duha ka mga babaye nga Green Sea Turtle nga nakita sang pila ka mga mangingisda sa kadagatan sang banwa sang Sapian kag Ivisan sang damlag lang.
Nag-upod sa mga katapo sang Philippine Coastguard nga nagdala sang mga pawikan sa lawud sanday Governor Esteban Contreras II, anay Governor Ting Borda, Atty. Emilyn Depon kag Provincial Administrator Dr. Edwin Chinel Monares.
Nahibaluan nga ginbaligya ang nasambit nga pawikan nga nakita sa Sapian nga nagahaba sang 89 sentimetros kag may kadakuon nga 78 sentimetros sa isa ka pribado nga indibidwal nga natabuan abyan ni Capiz Governor Esteban Evan Contreras II, tatlo ka adlaw na ang nakaligad.
Suno kay Governor Contreras nga ginhinyo sini sa abyan nga nagapanag-iya sang isa ka resort nga ibalik sa dagat ang babaye nga Green Sea Turtle nga makabig endangered species.
Ginpahayag nga tuman ka daku kag mabug-at ang nasambit nga pawikan bangud kinahanglan pa sang lima ka mga tawo nga magasakwat diri.
Samtang ginpahayag naman ni Atty. Emilyn ‘’Abeb’’Arboleda-Depon, pinuno sang CAPENRO nga bangud ginakabig nga endangered species ang green sea turtle, kinahanglan ini nga ibalik sa lawud nga amo ang ila habitat.
Nagpangabay man ini sa sin-o nga makakita sang pawikan nga indi pagpatyon kag indi pagkan-on, bangud may penalidad kag multa nga P300,000 nga pagabayaran ang madakpan nga nagakatay sini.
Magluwas diri, suno kay Atty. Abeb nga mahimo nga mabilanggo sa sulod sang apat ka tuig.
Ginpangalanan ni Governor Contreras ang pawikan nga nakita sa Sapian nga si Rose samtang ang isa amo si Evalyn.
