ROXAS CITY – Wala pa maka-file sang certificate of candidacy (COC) ang pila ka mga pulitiko nagikan sa duha ka mga balantayan nga partido sa probinsya sang Capiz.
Sa nakuha nga impormasyon sang Bombo Radyo sa pila ka miyembro sang PDP-Laban kag partido Liberal, suno diri nga posible sa masunod pa sila nga semana magapadulong sa Commission on Elections (Comelec) agud pormal nga mag-file sang certificate of candidacy.
Nahibaluan nga subong nga adlaw sang Biyernes, Oktubre 1, nagsugod sa bug-os nga pungsod ang filing sang COC sa mga pulitiko nga luyag magpapili sa palaabuton nga 2022 national kag local elections.
Sa pihak nga bahin, nag-file sang iya COC si Mr. Domingo “Domeng” Belonio, kag desidido ini nga magapapili sa pagka gobernador sang Capiz, kontra kay incumbent governor Esteban Evan Contreras.
Matandaan nga sang nagligad nga eleksyon, nagpapapili man sa pagka alkalde si Belonio kontra sa karon City Mayor Ronnie Dadivas.
