ROXAS CITY, CAPIZ – Arestado ang duha ka mga lalaki sa separado nga police operations sa Panay kag Ivisan sa probinsya sang Capiz.
Ginpasakaan sang kaso ang duha bangud sa paglapas sa Republic Act 10591 ukon Comprehensive Firearms and Ammunition Regulation Act kag Commission on Elections gun ban.
Ang mga suspek ang ginkilala nga sanday alyas Roy, 44, isa ka mangunguma nga taga Barangay Daga, Panay kag si alyas Blanco, 35, taga Barangay Poblacion Norte, Ivisan.
Gindakop si Roy kadungan sang ginpatigayon nga search operation sa Sitio Sugod, Barangay Daga, Panay.
Narekober sa iya balay ang .38-caliber revolver, apat ka live bullets sang kaangay nga armas, empty shell kag duha ka live shotgun shells.
Suno sa otoridad, wala si Roy nakapakita sang valid documents sang mga armas.
Samtang, si Blanco naman ang gin-aresto sa buy bust operation sa Barangay Sta. Cruz, Ivisan.
Nakumpiska sang Ivisan PNP sa pagpanguna ni PMaj. Ruby Magallanes ang .38-caliber revolver nga wala sang serial number kabaylo sang P2,500.
Na-recover man ang P500 nga cash, P4,000 nga boodle money kag brown nga bag.
Ang duha ka mga nadakpan ang yara na sa kustodiya sang mga kapulisan.
