ROXAS CITY – Dakop ang duha ka mga mangingisda nga anay na nadakpan nga nagapatigayon sang illegal nga pagpangisda, matapos maserbehan sang warrant of arrest sang mga katapo sang PNP-Maritime Group, sa Barangay VIII, Roxas City.
Sa interview sang Bombo Radyo kay PMaj. Wilmar Bolivar hepe sang Capiz Maritime Police Station, ang nasambit nga mga mangingsida ang ginkilala nga sanday alyas Ron, 27-anyos kag nagatinir sa Brgy. VIII kag si alyas Ray, 57-anyos nga tenmporaryo nga naga-istar sa Brgy. Banica, Roxas City apang mga residente sang Balud, Masbate.
Suno kay Bolivar, kaso nga paglapas sa R.A. 10654 ukon “An Act to prevent, deter and eliminate illegal, unreported and unregulated fishing, nga nag-amyenda sa “Philippine Fisheries Code of 1998, ang paga-atubangon sang mga nagkaladakpan.
Matandaan nga nakuha sa paghinakop nanday alyas Ron kag alyas Ray ang duha tanan ka mga sakayan, ginapatihan dinamita, 20kls nga nanari-sari nga mga isda nagabalor sang P3,500.00 kag iban pa nga paraphernalias sang anay sila nga nadakpan sang nagligad nga bulan.
Sa karon, nagapabilin ang mga ini sa paghinakop sang Roxas City PNP kag natalana nga iga-transfer sa Bureau of Jail Mangement and Penology (BJMP) Capiz, para sa nagakaigo nga disposisyon.
