ROXAS CITY – Ginhilway na sa kustodiya sang Criminal Investigation and Detection Group – Capiz (CIDG-Capiz) ang duha ka mga nadakpan nga peke nga dentista sa syudad sang Roxas.
Sa pagpakig-angut sang Bombo Radyo kay Police Major Christopher Arthemius Devaras, hepe sang CIDG – Capiz, mahulog sa regular filing ang pagpasaka sang kaso batuk kanday Ma. Ernestina Villaron 27 anyos tumandok sang Barangay Jolongajog, Pontevedra, Capiz apang temporaryo nga nagatinir sa Brgy. Tanque sining syudad kag Floro alyas “Boy” Gadiano 63 anyos nga residente sang Barangay IX sining syudad.
Samtang suno naman kay Dr. Jorge Lamier II, Presidente sang Philippine Dental Association (PDA-CAPIZ CHAPTER), madamo na sang reklamo nga nabaton ang ila asosasyon angut sa iligal nga transaksyon sang mga suspetsado.
Nahibaluan nga si Villaron ang iligal nga nagapangtakod sang braces, samtang si Floro ang madugay na nga nagatakod sang pustiso.
Wala naman sang may napakita nga dokumento ukon lisensya ang duha ka suspetsado para nga mapamatud-an nga legal ang ila operasyon.
Mahimo nga magapangatubang sang panumbungon nga paglapas sa Republic Act 9484 ukon Philippine Dental Act of 2007 ang nasambit nga arestado.
