Nagtambong si Dumarao, Capiz Mayor Mateo Hachuela sa 2026 General Assembly sang League of Municipalities of the Philippines ukon LMP nga ginpatigayon sa Pasay City.
Ang amo nga aktibidad ang gintambungan sang mga 1,100 ka mga alkalde gikan sa nagkalain-lain nga munisipyo sa bug-os nga pungsod agud talakayon ang mga programa kag mga isyu nga naga-apekto sa mga lokal nga gobyerno.
Sa interview sang Bombo Radyo kay Mayor Hachuela, iya ginpahayag nga lakip sa ila gin-istoryahan amo ang paghatag sang pondo para sa dugang nga mga classroom agud mabuligan ang mga eskwelahan sa kabanwahanan.
Suno sa alkalde, ang mga proyekto sang national government ginahatag sa mga Local Government Unit ukon LGU agud nga mapatuman sa lokal nga lebel.
Gin-athag man sini nga importante ang transparency kag accountability sang mga LGU sa pagpatuman sang mga proyekto kag programa sang gobyerno.
Dugang pa ni Hachuela nga ginahimo sang ila administrasyon ang tanan nga tikang suno sa mga direktiba sang national government agud masiguro ang kaayuhan sang komunidad.
