DUMARAO, CAPIZ – Nagapanawagan ang mga kapulisan sang Dumarao Municipal Police Station sa suspek nga nagluthang-patay sa mag-iloy sa Barangay Sagrada Familia, Dumarao, Capiz nga magsungka na kag atubangon ang krimen nga ginhimo.
Ang biktima amo si alyas Rose, 52-anyos, isa ka iloy kag ang anak sini nga si alyas Mark, 25-anyos.
Samtang ang suspek naman amo si alyas Romel, utod ni Rose.
Sa interview sang Bombo Radyo kay Police Lieutenant Russel Husmalaga, Public Information Officer sang Dumarao Municipal Police Station, iya ginpahayag nga away sa duta ang ginalantaw motibo sa pagluthang sa mag-iloy.
Antes pa man ang insidente samtang nagapangupo sang suha ang mag-iloy, nag-abot ang suspek kag may natabo nga komprontasyon.
Suno kay Husmalaga, dead on arrival ang mag-iloy kag nagpalagyo naman ang suspek.
Nakit-an naman sa lugar ang apat ka fired shell sang caliber 45 nga armas.
