Dump truck nga may sakay sang mga tawo pakadto sa isa ka okasyon, nagbaliskad; Lima ka mga indibidwal, patay

Patay ang lima ka tawo lakip ang duha ka menor de edad sang nagbaliskad ang dump truck sa Kabayan, Benguet.

Suno sa kapulisan, naguwa sa imbestigasyon nga naghalin sa Bauko, Mountain Province ang mga pasahero sang dump truck kag padulong kuntani sa Bambang, Nueva Vizcaya para sa isa ka kahiwatan.

Matapos nga makalab-ot sa kurbada nga bahin sang Barangay Poblacion, ginaalegar nga nagbaliskad ang truck.

Kapin sa 30 ka mga tawo ang sakay sang truck, madamo sa ila ang napilasan, lakip na ang driver.

Padayon pa ang imbestigasyon sa nasambit nga insidente.