AGSIRAB, Dumarao, Capiz – Patay na nga nasapwan ang isa ka lalaki sa Barangay Agsirab, Dumarao Capiz.
Ang biktima amo si alyas Ren, 60-anyos, residente sang Passi, City, Iloilo.
Sa interview sang Bombo Radyo kay Police Lieutenant Russell G Husmalaga, Officer in Charge sang Dumarao Municipal Police Station, iya ginpahayag nga nakabaton sila sang impormasyon parte sa insidente sang aga kag gilayon nga nagresponde sa lugar kin sa diin makit-an sa sulod sang creek nga natabunan sang nagbaliskad nga tricycle.
Suno kay Husmalaga ang biktima nakit-an sa creek nga may kataason nga ginabulubanta lima ka metros halin sa karsada, samtang yara sa idalom sang nagbaliskad nga tricycle.
Pahayag pa niya sa inisyal nga imbestigasyon sang kapulisan, posible nga nadisgrasya ang biktima samtang nagamaneho kag nahulog sa creek, nga gintunaan sang iya kamatayon.
Apang, padayon pa ang pag-usisa sa insidente agud makumpirmar ang eksakto nga kabangdanan sini.
Dugang pa sa impormasyon ginpahayag man ni Husmalaga nga medyo madulom kag takason ang lugar, samtang ang una nga insidente nga kaangay sini sa amo nga partikular nga lugar, suno sa iya.
Sa karon nahibaluan nakuha na sang pamilya ang bangkay sang biktima, samtang ginapahanumdom man sang Dumarao MPS sa mga motorista nga maghalong sa pagbiyahe, inspeksyunon anay ang kondisyon sang ila salakyan kag siguruhon nga maayo ang ila lawas antes magmaneho agud malikawan ang mga aksidente sa dalan.











