ROXAS CITY – Nagalab-ot sa 34,489 learners ang records sang DepEd Capiz Division humalin sang ginsuguran ang early registration sang Mayo 10 tubtob Hunyo 9.
Ini ang ginakalakipan sang mga estudyante sa kindergarten, grade 1, grade 7 kag grade 11.
Ginalauman man nga magadugang pa ini samtang nagahilapit ang pagbukas sang klase sa bulan sang Agosto, mataas naman ini nga datos kun ikumparar sang nagligad nga tuig nga rehisto sang mga estudyante nga naglab-ot lang sa 29,910.
Sa interview sang Bombo Radyo kay Dr. Marlon Destreza ang chief sang school and governance operations sang Capiz Division, kabahin ini sang kampanya sang mga school principal sa tanan nga mga buluthuan.
Ginklaro pa ni Destreza nga dapat naga-edad na sang 5 katuig ang bata antes mag-October 31 kay may ginasunod nga cut-off age sa DepEd.
Samtang dapat ara gid ang mga ginikanan ukon guardian nga magkadto sa eskwelahan kag magpresentar sang birth certificate para sa mga kindergarten.
Indi man pwede nga balibaran ang mga ulihe na nga magparehistro kag pagabaton man ini sa gihapun.
Dugang ni Destreza ang early registration ang nagadetirminar sa mga request kag igahatag nga pondo para sa eskwelahan.
