Gintawag sang Employers Confederation of the Philippines (ECOP) nga counterproductive kag posible nga makaapekto sa ekonomiya ang hagna nga dugang nga P200 across-the board sa adlawan nga sahod sang mga trabahador sang pribado nga sektor.
Suno kay ECOP President Sergio Ortiz-Luiz Jr, maayo ini nga mabatian sa pagpamatuod pero pila lamang ang mabenepisyuhan sini.
Madamo nga mga mamumugon sa karon ang yara sa informal sector.
Masobra katunga sang mga negosyante sa pungsod ang yara sa micro and small enterprises rason nga mabudlay sa mga ini ang pag-implementar sang dugang nga P200 sa adlawan nga sahod sa mga mamumugon nila.
Magaresulta lamang ini sa pagtaas sang presyo sang mga produkto sang mga negosyante ukon mas mabug-at, ang pagbuhin nila sang mga tinawo.
Ang maayo na lamang diri ang isurender ang desisyon sa mga regional wage board kun sa diin ginabuo ini sang gobyerno, employers kag mga mamumugon.
Matandaan nga gin-aprubahan na sang House Committee on Labor and Employment ang hagna nga P200 across-the-board increase sa adlawan nga sahod sang mga mamumugon sa pribado nga sektor.
