ROXAS CITY, CAPIZ – Masadya kag malinong nga ginsaulog sang mga kauturan nga Muslim sa Capiz ang Eid al-Fitr, isa ka bilidhon nga selebrasyon nga nagapatimaan sang katapusan sang balaan nga bulan sang Ramadan.
Sa interview sang Bombo Radyo Roxas kay Imam Abdul Rahman, iya ginpahayag nga kapin sa 100 ka Muslim nga pamilya sa Capiz ang nagtipon-tipon agud saulugon ang sinadya kag makahulugan nga adlaw sang Eid.
Suno kay Imam, daku gid ang ila pagpasalamat kay Allah matapos nila malampuwasan ang 30 ka adlaw sang puasa — isa ka panahon sang pagsakripisyo, pagpamalandong, kag pag-ampo.
Ginpabutyag man ni Imam Abdul Rahman nga isa sa mga pinakabilidhon nga leksyon sang Ramadan amo ang paghigugma kag pagpalangga sa pamilya, ginikanan, abyan, kag kapareho nga Muslim, lakip na ang pagbulig sa mga pigado kag nagakinahanglan.
Sa prayer ground, malinong nga ginpatigayon ang Eid prayer, nga ginsundan sang pagsinalu-salo, pagbaylohanay sang regalo, kag mga programa para sa komunidad.
Bisan ang mga kabataan aktibo man nga nagpartisipar sa mga aktibidad, kabahin sang pagpabaskug sang ila pagtuo kag pagsaulog sang tradisyon.
Ang selebrasyon nagapakita sang padayon nga pag-uswag sang kultura sang Islam sa rehiyon, respeto kag pagkilala sang mga Pilipino sa pagtuo sang mga Muslim.
Padayon man ang suporta sang LGU kag mga pribado nga sektor sa pagtukod sang interfaith harmony kag kalinong sa sosyodad.
