Napaslawan si EJ Obiena nga makasulod sa podium sa bag-o lang natapos nga Wanda Diamond League sa Keqiao, China sang Sabado, Mayo 3, nga nagtapos sa ikalima nga pwesto.
Ang world No. 4 nga pole vaulter nakalab-ot lamang sang 5.72 metros, nga nagtabla sa iya sa tatlo pa ka mga atleta, apang nahulog ini sa ika-lima nga pwesto bangud sa countback.
May tsansa pa ini nga makalab-ot sa podium apang napaslawan sa iya tatlo ka pagtinguha sa 5.82 metros. Nagpabilin nga nagapanguna si Mondo Duplantis sang Sweden sa iya 6.11 metros nga attempt, samtang ikaduha naman ang Greece nga si Emmanouil Karalis nga may kataason nga 6.01 metros.
Apisar nga wala ini nakalab-ot sa podium, ginkabig nga mas maayo ang performance ni Obiena sang sa iya first leg sang Diamond League sa Xiamen, China kun sa diin naka-clear ini sang 5.62 metros.
Pagkatapos sang kompetisyon, ginalauman nga magabalik sa Pilipinas si Obiena para sa PATAFA Pole Vault Challenge nga iya ginbuligan sa pag-organisar sa Ayala Vermosa Sports Hub sa Cavite sa Mayo 6.
