Yara na sa kondisyon ang kaugalingon ni Pinoy pole vaulter EJ Obiena para sa iya nagahilapit nga pagsabak sa outdoor games.
Sa palaabuton nga Abril 26 magapasakop ang World number 4 sa Xiamen leg sang Diamond League.
Makaatubang sini ang pila ka mga pamilyar nga mga pangalan kasubong nanday world-record holder kag 2024 Paris Olympic gold medalist Armand Duplantis, silver finisher Sam Kendricks kag bronze medalist Emmanouil Karalis.
Ginpahayag sang iya nga iloy nga si Jeanette Obiena, nga dalayon nga nag-ayo ang 6-foot-2 nga anak gikan sa back injury.
Wala na ini nagpasakop sa 2025 World Athletics Indoor Championships sadtong Marso agud ipokus ang hampang sa outdoor. Matandaan nga nagdaog ini sa Taiwan International Pole Vault Championship sa una nga semana sang Abril.
