MANILA, Philippines – Gin-question sang election lawyer nga si Romulo Macalintal ang desisyon sang Commission on Elections (Comelec) nga gin-clear si Rodante Marcoleta bangod sa iya kontrobersyal nga Statement of Contributions and Expenditure (SOCE), samtang ginpadayon ang kaso batok sa iya mga donors.
Sa resolusyon sang Comelec, ginpahayag nga wala nakasunod si Marcoleta sa Section 109 sang Omnibus Election Code nga naga-require sang detalyado nga SOCE, apang wala ini ginlantaw bilang election offense bangod gin-repeal na ini sang Section 39 sang Republic Act No. 7166.
Bangod sini, indi mahimo nga papanaguton si Marcoleta sa wala pagdeklara sang P75 milyon sa iya SOCE tungod sa kakulang sang nagapadapat nga penal nga balaod.
Suno kay Macalintal, daw ginbaton sang Comelec ang depensa ni Marcoleta nga ang mga donasyon ginbaton antes magsugod ang campaign period sang 2025, gani wala ini sakop sang SOCE suno sa Section 15 sang Republic Act No. 8436.
Apang, ginpahayag man sang Comelec nga ang mga donors ni Marcoleta mahimo gihapon papanaguton sa idalom sang Section 99 sang Omnibus Election Code nga naga-mandato nga ang bisan sin-o nga maghatag donasyon sa kandidato kinahanglan mag-report sini sulod sang 30 ka adlaw pagkatapos sang eleksyon.
Ginpunto ni Macalintal nga may kakulangan sa pag-aplikar sang nasambit nga probisyon, bangod nagapatuhoy ini sa “kandidato” bilang recipient sang donasyon, kag ginpamangkot niya kun paano ini maaplikar sa donors kun si Marcoleta wala ginlantaw bilang kandidato sa amo nga sitwasyon.
Dugang pa niya, ang ginbaton nga kwarta indi man dapat iklasipikar bilang donasyon para sa partisan political activity base sa lohika sang Comelec, nga nagahatag sang dugang nga isyu sa nasambit nga desisyon.
