Empleyado sa Kuwait, arestado matapos magbaton sang sweldo apisar wala ini nagasulod sa trabaho sa sulod sang 10 ka tuig

Ginpamatbatan sang lima ka tuig nga pagkapreso ang isa ka empleyado sang gobyerno sa Kuwait matapos mapamatud-an nga nagabaton ini sang sweldo sa sulod sang isa ka dekada apisar nga wala man ini nagatrabaho.

Magluwas sa pagkapreso, ginmanduan man sang Court of Cassation nga magbayad ang wala ginhingadlan nga akusado sang 312,000 Kuwaiti Dinar ukon masobra P59 million.

Lakip sa bayadan sini amo ang pagbalik sang kabug-osan nga sweldo nga nakuha niya nga nagabalor 104,000 Kuwaiti Dinar ukon masobra P20 million kag ang multa nga doble sang balor sini.

Nahibaluan nga sa sulod sang 10 ka tuig, dalayon ang pagdeposito sang sweldo sa iya bank account kada bulan apisar nga absent siya kag wala sang may ginahimo nga trabaho.