Nagpagwa sang direktiba ang Energy Regulatory Commission (ERC) nga ipauntat anay ang pag-disconnect sang kuryente sa residential kag non-residential consumers halin Mayo tubtob Hulyo 2026.
Ginpasugtan man sang ERC ang installment payment nga mahimo bayaran sa tatlo ka bulan agud mas mamag-an para sa mga konsumedor ang pagbayad sang ila bill.
Sakup sang polisiya ang mga konsumo nga indi magsobra sa 200 kilowatt-hours kada bulan, kag mahimo ini mabayaran paagi sa tatlo ka hulog.
Suno sa ERC, ginpatuman ini agud mabuligan ang mga konsumedor batuk sa mataas nga balaydan sa kuryente nga ginhalinan sang pagsaka sang presyo sang enerhiya bangud sang tensyon sa Middle East.
Dugang pa sang ahensya, ang wala pa mabayran nga payment sa distribution utilities mahimo ipasa anay sa power generators agud mabuligan ang mga konsumedor.
Ginpahayag sang ERC nga kabahin ini sang emergency measures agud masiguro nga wala sang konsyumer ang madulaan sang kuryente sa tion sang pagsaka sang presyo sini.
