ROXAS CITY-Magasugod na sa Setyembre 1 ang enumeration period para sa 2020 Census of Population and Housing ukon POPCEN sang Philippine Statistics Office (PSA) sa probinsiya.
Ini ang ginkompirmar ni Engr. Frankie D. Dordas, Provincial Statistics Officer sang PSA-Capiz sang mainterview sang Bombo Radyo.//
Ginpahayag ni Dordas nga importante ang POPCEN bangud ini ginabasihan ang mga igaimplementar nga mga programa sang gobyerno kalakip na ang pag-alokar sang Internal Revenue Allotment ukon IRA kag pag-alokar man sang distrito sa probinsiya.
Suno kay Dordas nga magalawig sang isa ka bulan ang enumeration period apang ginalauman nga magalawig pa bangud may pila ka mga kabaranggayan ang ipaiway sa enumeration bangud man sa lockdown.
Gin-athag sini nga indi mapaiway ang POPCEN sa pihak nga may yara sang COVID
-19 bangud may yara ini sang nagakaigo nga mandatos gikan sa gobyerno nasyunal.
Ginpasiguro ni Dordas nga hugot nga igapatuman ang kapin 1,000 ka mga enumeration nga mga health protocols agud malikawan nga malatnan sang virus ang mga tawo.
Ginpahandumdum man sini sa publiko nga may yara sang salabton sa layi ukon pagkabilanggo nga indi magnubo sa isa ka tuig kag multa nga kapin sa P100,000 ang indi magkooperar ukon magsunod nga mga houselholds.
Samtang nagpanawagan naman ini sang kooperasyon sa mga pumuluyo sa probinsya sang Capiz.
