Naglab-ot sa 32 minutos antes ginpagwa ang desisyon ni Presiding Officer kag Senate President Francis “Chiz” Escudero may kaangtanan sa online post ni Atty. Virgil Ligutan sang Agosto 12, 2026, nga nagatalakay sa ginapatihan nga paggamit sang misleading questions sa ginahimo nga cross-examination.
Sa iya ruling, gin-emphasize man ni Escudero ang paggamit sang indi nagakaigo nga mga pahayag sa nagapadayon nga impeachment trial batuk kay Vice President Sara Duterte, pareho sang “scam,” “scammer,” kag iban pa nga kaanggid nga mga akusasyon.
Suno kay Escudero, bisan bukas sa publiko ang impeachment court, indi gid niya pagtugutan nga mangin “trial by publicity” ang trial, ilabi na ang paggamit sang social media platforms sa pagtalakay sang merito kag iban pa nga mga isyu nga may kaangtanan sa kaso.
Bangud sini, nagpagwa ang Presiding Officer sang strict warning kag nagpabutyag nga indi lamang pormal nga paandam ang posible nga silot sang korte kay Ligutan, sa bilog nga prosecution team, defense counsel, kag bisan sa mga senator-judges kun magliwat pa sila sang amu nga mga binuhatan samtang nagapadayon ang trial.
Ginpaandaman liwat ni Escudero ang tanan nga panig nga untatan na gilayon ang pag-post sang bisan ano nga komentaryo ukon mga isyu parte sa trial sa bisan ano nga social media page.
Ginpasalig sang senador nga ang paggamit sang social media agud usisaon ang mga isyu ukon maimpluwensyahan ang panan-aw sang publiko sa guwa sang impeachment court isa ka direkta nga paghalit sa integridad sang bilog nga trial.
