ROXAS CITY – Ginkumpirma sang punong barangay sang Barangay Bolo, Roxas City nga ginahimo nga lodging house ang pila ka mga hulot klasehan sang Venancio Alba Elementary School.
Sa interview sang Bombo Radyo Roxas kay Barangay Kapitan Siolly Andrade sang Barangay Bolo, Roxas City, ginpahayag sini nga makapila na sila ka beses nga naka-akto sang pila ka mga kabataan nga ginahimo nga palautwasan sang init sang ila lawas ang compound sang eskwelahan samtang ang iban naman ang hungod nga nagasulod sa mga hulot klasehan.
Suno sa opisyal nga indi lamang mga taga Barangay Bolo ang ila nadakpan, kundi may iban man nga nagasayo lamang .
May mga magpartner man nga mga babaye kag lalaki kag iban diri ang mga bading kag lalaki.
Masami nga disoras sang gabi kun magsulod sa compound sang eskwelahan ang mga kabataan, sa diin ginahulat sang opisyal kag kaupdanan nga mga tanod nga yara sa akto sang pagpakighilawas ang magpartner antes sila sitahon kag dalhon sa police station.
Dismayado man si Kapitan Andrade, bangud napalab-ot na sini ang ila nasaksihan sa pamunuan sang buluthuan kag naghatag naman sang advice nga ilisan ang kandado sa mga hulot klasehan, para indi ini gilayon nga mabuksan sang nagatuyo nga magsulod.
Nahibaluan nga wala sang security guard ang eskwelahan kag magaduda lamang sila nga may nakasulod na naman kun sa ila nga pagronda sa kagab-ihon may makita sila nga mga motorsiklo ukon tricycle nga nakaparada sa atubang mismo sang buluthuan sang disoras sang gab-i.
