ROXAS CITY – Ginhinalaan sa ginpatigayon nga session sa Sangguniang Panlungsod sa syudad sang Roxas ang nabaton nga mga reklamo sang pila ka mga City Councilors kun ano na ang estado sang supplemental budget nga gin-alokar sang City Government para sa mga Barangay Officials, Tanod kag Barangay Health Workers.
Direkta nga ginpamangkot ni City Councilor Jericho Angel Celino si City Councilor Trina Almalbis Ignacio kun bala nagikan sa pondo sang City Government ukon personal nga kwarta ni City Mayor Ronnie Dadivas ang ginpaabot sini nga cash gift para sa pila ka mga BHW’s kag mga Tanod sang nakaligad nga Disyembre 2020.
Suno kay Ignacio nga ang pondo nga gingamit para sa cash gift ang nagikan sa gin-appropriate nga mga bonuses kun sa diin naistoryahan man nakaligad sa konseho.
Magapatawag naman sang committee meeting ang city council sa maabot nga Enero 7, 2021 alas 9 sa aga kun sin-o ang nagahawid sang datus sang supplemental budget kag igapatawag man ang mga nagareklamo agud masabat man ang mga palamangkutanon sang kada-isa.
Mahibaluan nga nalakip ini sa gin-istoryahan sa city council matapos may pila ka mga barangay officials ang nagpaabot sang reklamo sa magkatuhay nga mga City Councilors.
