Arestado ang isa ka estudyante nga babaye matapos nga ginserbehan sang Warrant of Arrest sang mga katapo sang Roxas City Police Station sa Pueblo de Panay, Barangay Lawaan, Roxas City.
Sa impormasyon nga nakuha sang Bombo Radyo nagikan sa Roxas City Police Station, ginkilala ang arestado kay alyas “Jerlyn”, 20-anyos, 1st year college student kag residente sang Sitio Nasagud, Barangay Lanot, Roxas City.
Nagapangatubang sa kaso nga 4 counts sang Qualified Theft kun sa diin ginrekomendar ang kabug-usan P210,000 nga pyansa para sa temporaryo sini nga kahilwayan.
Ang nasambit nga warrant of arrest ang gin-isyu kag ginpirmahan ni Hon. Sesinio Navales Belen Jr., Presiding Judge, Regional Judicial Region, Branch 15, Roxas City kag napetsahan Abril 3, 2025.
Sa karon, yara na ini sa kustodiya sang Roxas City Police Station para sa nagakaigo nga disposisyon.
