ROXAS CITY – Arestado ang isa ka ex-convict matapos madakpan sa ginkasa nga drug buybust operation sang gintingob nga pwersa sang Provincial Drug Enforcement Unit sang Capiz Police Provincial Office kag Philippine Drug Enforcement Agency (PDEA) Capiz sa Pueblo de Panay, Barangay Lawaan, Roxas City.
Ginkilala ang nadakpan kay Julius Andama, 38 anyos, residente sang nasambit man nga barangay.
Suno kay Police Lieutenant Tobias Garfin, team leader sang PDEU, halos tatlo ka semana nila nga gin-monitor ang ilegal nga buluhaton sang suspek antes nila ini ginpaidalom sa operasyon.
Suno pa kay Garfin, naaresto na sadto ang suspek bangud man sa kaso sa ilegal nga droga apang ginpahilway pinaagi sa plea bargaining.
Narekober sa suspek ang walo tanan ka sachets sang ginapatihan shabu, suspected marijuana, isa ka unit sang cellphone, pouch, motorsiklo kag P1, 000 nga marked money.
Ginkompirma naman ni Punong Barangay Jocelyn Asis nga drug surrenderee sang ila barangay ang suspek.
Apang suno kay Asis, malaka na lang kun masiplatan sa ila lugar si Andama.
Depensa naman sang suspek nga wala sang kamatuoran nga nagaduso siya sang ilegal nga droga.
Ginpahayag ni Andama nga nagagamit lamang ini kag nagakuha sang suplay sa Pavia Street, Barangay 9, sining siyudad.
Suno pa sa iya nga tatlo ka beses sa isa ka semana ini kun maggamit sang ilegal nga droga apang wala siya nagabaligya.
Nagamaneho lamang siya suno sa iya sang motorsiklo sang ginparahan sang mga kapulisan sa nasambit nga lugar kag ginrekisahan.
