Nagpaligad sang gab-i sa talatapan sang National Bureau of Investigation (NBI) sa syudad sang Pasay si anay Negros Oriental Rep. Arnolfo “Arnie” Teves Jr.
Ginpahayag ni NBI Director Jaime Santiago nga ginhatag nila ang iya request bangud sa konsiderasyon sa iya kakapoy gikan sa biyahe halin sa Timor Leste.
Pasado alas 12 sang tungang gab-i sang Mayo 30 sang nag-abot sa NBI ang anay mamalidha.
Nagpaidalom sia sa isa ka medikal nga eksaminasyon antes ginkuha ang iya mga fingerprints kag pila ka mga dokumentaryo nga mga pamaagi.
Nag-abot man sa opisina sang NBI ang abogado ni Teves nga si Atty. Ferdinand Topacio subong man ang iloy sang anay mamalidha nga si Zenaida Teves.
Suno kay Atty. Topacio, nga ginpahayag nga tuman ka excited ang iloy sang anay mamalidha bangud masobra na duha ka tuig nga wala sila nagkit-anay.
Gindayaw ni Topacio si NBI Director Jaime Santiago bangud ginpahanugutan sini nga temporaryo nga magtener sa ila opisina si Teves antes ginsaylo sa detention facility.
Ginsiling sini nga nagahimo man sila sang mga tikang agud depensahan ang mga kaso nga ginapangatubang sang anay mamalidha.
Madumduman nga si Teves ang gin-akusaran nga mastermind sa pagpatay kay anay Negros Oriental Governor Roel Degamo.
