Natukiban sang isa ka mangunguma ang isa ka ginapahayag nga explosive device sa Sitio Basiao, Barangay Basiao, Ivisan, Capiz.
Sa impormasyon nga nakuha sang Bombo Radyo Roxas sa Ivisan Municipal Police Station, ginpahayag samtang nagatrabaho sa ginarentahan nga uma si alyas “Arnie”, 33-anyos, residente sang Brgy. Balaring sa amo nga banwa, sang makita ang nasambit nga explosive device kag madasig nga nagreport ini sa kapulisan.
Gilayon naman nga nagpadulong sa lugar ang katapo sang Ivisan PNP upod ang Explosive Ordnance Disposal (EOD) team agud kumpirmahon kag masiguro nga wala ini sang halit sa seguridad sang mga residente.
Sa subong, yara na sa pagdumala sang EOD team ang nasambit nga explosive para sa nagakaigo nga dsposisyon.
Ginapasalamatan sang kapulisan ang madasig nga aksyon sang mangunguma nga nag-report sang insidente, nga nagbulig malikawan ang posible nga disgrasya sa komunidad.
