Naglab-ot sa record high nga $149.1 billion ang external debt sang Pilipinas tubtob sa katapusan sang Setyembre 2025, suno sa Bangko Sentral ng Pilipinas (BSP). Nagtaas ini sang 0.1 percent kun ipaanggid sa nauna nga quarter, tuga sang $1.5 billion net acquisition sang Philippine debt securities sang mga non-resident investor.
Nabuhinan gamay ang pagtaas bangud sa $764.6 million net repayments kag valuation adjustments nga $442.5 million tuga sang pagkusog sang dolyar kontra sa piso. Sa pihak sini, ginsiling sang BSP nga nagapabilin nga sustainable ang utang sang pungsod, kun sa diin nagnubo ang foreign debt-to-Gross Domestic Product ratio sa 30.9 percent.
Sa year-on-year basis, nagsaka sang 6.8 percent ang external debt bangud sa bag-o nga pagpangutang, kalakip ang global bond issuances sang gobyerno kag external financing sang mga bangko.
Dugang pa sang BSP, bastante ang $109.1 billion gross international reserves agud maaksyona ang pangguwa nga obligasyon sang pungsod, samtang nagaayo man ang debt service ratio sa 8.5 percent.
