ROXAS CITY-Ginalaoman nga magasugod na sa masunod nga semana ang implementasyon sa pagpanakup sa mga nagalapas sa wala nagasuksok sang faceshield kag facemask.
Suno kay City Councilor Atty. Albert Gregory Potato, ginkalipay man sini ang pag-aprubar ang gindihon sini nga ordinansa.//
Ginakabig man sini nga nangin “unanimous” ang desisyon sang konseho bangud suno diri pareho lamang sila sang kawsa nga magpakigbatuan ang balatian nga COVID-19.
Ginpatpat man sini ang mga penalidad nga pagabayaran sa tion nga madakpan ang isa ka indibidwal nga wala nagasuksok sang facemask kag faceshield.
Suno diri, kun sin-o man ang madakpan nga magalapas mahimo nga magabayad sang P500 sa first offense kag kung wala sang maipresentar nga kwarta, kinahanglan nga magaserbisyo sang apat ka oras nga community service; P3,000 naman sa second offense apang kun wala man sang may maipresentar nga kwarta, mahimo nga magserbisyo sa sulod sang isa ka adlaw nga community service kag P5,000 naman sa third offense.
Apang bangud duha ini ka mga ordinansa, ginklaro sini nga kung sino nga indibidwal ang madakpan nga wala nagasuksok sang facemask kag faceshield sa mga lugar nga kinahanglanon nga suksukon kapareho sang public market, terminal, malls kag pila ka closed areas, pagadoblehon ang penalidad sini.
Gintuad man sini nga may pila man ka mga lugar nga “exemptions” sa pagsuksok sang faceshield.
Ginpahanumdom man sini ang tanan nga mga drivers sang pampubliko nga salakyan kag tricycle nga mahimo indi na pagpasakyon ang mga pasahero sa tion nga wala nagasuksok sang faceshield.
Nagpanugyan naman ini sa publiko sang kooperasyon pinaagi sa pagsunod kung ano ang mga mando sang lokal nga gobyerno para sa pag-amlig kag pagpabilin sang seguridad batuk sa COVID-19.
