ROXAS CITY – Kun may yara sang ‘Love at First Sight,’ ang mag-asawa nga Aguilar ang may yara sang ginatawag nga ‘Love at First Hi.’
Wala ginlauman sang isa ka soltero nga nagapamati na gali sa radyo ang iya mangin kaupod tubtob sa katubtoban, kag wala man ginlauman sang isa ka balo nga babayi nga makaangkon pa ini sang panibag-o nga paghigugma pinaagi sa pagpamati sang Musika mo sa Bombo.
Ini ang nangin love story sang mag-asawa nga Aguilar nga sanday Erwin, 32-anyos kag Mary Ann, 44-anyos.
Sa interview sang Bombo Radyo kay Erwin, tumandok sang Passi City, ginpahayag sini nga madugay na siya nagapamati sa nasambit nga programa kada Domingo kag bangud soltero, gintestingan sini nga mangin caller kag ginwaragwag ang iya contact number sang Marso 2021.
Suno naman kay Mary Ann, sang Dumalag, nga bangud wala ini sang libang sadto nga inoras, gintestingan sini nga kopyahon ang numero nga ginlawag ni Erwin, kag gintext sini sang duha ka letra nga “Hi.”
Didto na nagsugod ang ila pagbayluhanay sang mensahe, tubtob nga nagdesisyon sila nga mag-meet sa plaza sang Dumalag sang Agosto 2021.
Ginpahayag ni Erwin nga madamo man ang nagtext sa iya pagkatapos sini ginlawag ang iya number apang kay Mary Ann lang nga numero ang nakakuha sang iya atensyon.
Gin-aku man ni Mary Ann nga balo na ini kag may yara sang isa ka bata, apang wala ini nangin upang kay Erwin nga higugmaon pa gid ang babayi.
Tubtob sang Enero 12, 2022, nagdesisyon ang duha nga magpakasal sa Simbahan.
Wala paman isa ka tuig sumugod sang sila nagkilalahay, ang importante nga malipayon ang mga ini nga magaupdanay tubtob sa katapusan.
