ROXAS CITY – Nagalab-ot sa P10,000 nga kantidad sang kuarta ang nataban sang ginapatihan salisi gang sa isa ka fast food chain sa sulod sang isa ka mall sa Barangay 8, Roxas City.
Suno kay Guenne Sarabelle Diawara 23-anyos service crew sang isa ka fastfood chain may nagpalapit nga duha ka lalaki kag nagpamangkot kun mahimo sila makapabaylo sang tag 100 sa kantidad nga P23,000.
Matapos ginpasugtan sang manager ang cashier nagsugod na ini sa pag-isip sang tag P100.00
Apang hinali nga nagbag-o ang pinsar sang suspek kag ginhambalan ang cashier nga sa baylo nga tag P100 ang ipakambyo, tag 10.00 na lamang nga sinsenyuhon.
Bangud diri, wala na nagpasugot ang manager gani ginbalik na lamang sang mga suspek ang kuwarta kag ginbawi naman ang pera kag gilayon nga nagbiya sa lugar.
Nadiskubrehan lamang sang cashier nga nasalisihan ini sang nag-inventory na kag natukiban nga kulang sang P10,000.
Sa pagtsekyar sa closed circuit television camera (CCTV) ila nakita ang madasig nga pagtago sang isa ka suspek sang nakuha nga kuwarta samtang ang isa naman ka suspek ang gina-estorya ang cashier agud indi makita ang ginahimo sang kaupod nga suspek.
