Ginakonsidera ni FIFA President Gianni Infantino ang posibilidad nga dugangan ang numero sang teams sa 2030 FIFA World Cup halin sa 48 nga mangin 64 teams na.
Ginpahayag ni Infantino nga ang pagdugang sang 16 ka teams ang magahatag sang kahigayunan para sa iban nga pungsod kag para sa future sang tournament.
“This is an issue that will be examined and discussed after this World Cup,” suno sa iya.
Pahayag pa ni Infantino, importante nga ang World Cup para sa bilog nga kalibutan, indi lang para sa Europe kag South America.
Dugang pa niya, dapat may yara sang tyansa ang tanan nga pungsod nga makaupod kag mangin kabahin sang football tournament sa kalibutan.
Suno pa sa FIFA President, nagataas ang kalidad sang football teams sa iban nga mga pungsod.
Kun wala sang oportunidad ang mas gamay nga mga pungsod nga makasulod sa World Cup, mahimo nga mabudlayan sila nga magpadayon sa pag-improve sang ila football programs.
Halin sang 1998 tubtob 2022, 32 ka teams lang ang nagapartisipar sa World Cup finals.
Subong nga 2026 edition, amo ini ang una nga World Cup nga may 48 ka teams.
Sa subong nga tournament, apat na lang ka teams ang nabilin nga ginalakipan sang Argentina, England, France, kag Spain.
Duha ka semifinal matches kag ang final na lang ang nabilin sa kabug-usan nga 104-game schedule nga ginahimo sa Canada, Mexico, kag United States.
Suno kay Infantino, dako nga kadalag-an ang pagdugang sa 48-team format.
“Every team played at a high level. Teams from every continent scored goals and earned at least one point,” pahayag niya.
Ginpabutyag man sini nga siyam sa napulo ka African teams ang nakalab-ot sa knockout stage, kun ipaanggid sa nagligad nga World Cup nga lima lang ka African teams ang nakasulod.
Para sa iya, ginapakita sini nga importante ang paghatag sang oportunidad sa mas madamo nga mga pungsod.
Ang 2030 FIFA World Cup himuon sa madamo nga kontinente.
Ang una nga tatlo ka matches hiwaton sa Uruguay, Argentina, kag Paraguay, tag-isa ka match sa kada pungsod.
Ang nabilin nga mga games hiwaton sa Morocco, Portugal, kag Spain.
Kun maaprubahan ang 64-team expansion, posible nga ang Uruguay, Argentina, kag Paraguay ang mangin host sang isa ka four-team group kada isa, sa baylo nga isa lang ka match.
