Gin-recall sa Australia ang pila ka units sang Chery Omoda 5 SUV matapos madiskubre ang posible nga depekto sa welding sang rear axle assembly sini nga mahimo magresulta sa pagkadula sang kontrol sang driver sa salakyan.
Suno kay Bombo Denmark Suede, International Correspondent sa Australia, ginpaathag sini ang rason sa likod sang recall kag ang posible nga peligro nga mahimo maagyan sang mga motorista nga nagagamit sang amo nga modelo sang salakyan.
Pahayag sini, posible nga depekto may ang kaangtanan sa maluya nga welding sa rear axle component sang pila ka units nga gin-produce para sa Australian market. Posible nga magluag ukon mabuka ang koneksyon sang piyesa nga mahimo makaapekto sa stability kag safety sang salakyan samtang nagabiyahe.
Dugang pa, bilang precautionary measure, ginapanawagan ang mga tag-iya sang apektado nga Chery Omoda 5 nga magpakig-angot sa ila dealership agud mapa-inspeksyon ang ila salakyan kag masiguro nga wala ini sang problema. Libre man ang pag-ilis sang piyesa kon makumpirmar nga apektado ang unit.
