May yara na sang nagapanguna nga preparasyon ang Barangay Dayao Roxas City agud maatubang ang posible nga epekto sang El Niño, lakip na ang pagtipig sang tubig, pagpreparar sang water containers kag pagpatigayon sang information campaign sa mga pumuluyo.
Ginkilala ni Punong Barangay Wennie Batuampo sang Barangay Dayao nga importante ang temprano nga pagpanghanda agud masiguro nga may yara sang bastante nga suplay sang tubig ang mga pumuluyo sa tion sang posible nga kakulangon sini.
Sa interview sang Bombo Radyo kay Punong Barangay Wennie Batuampo, iya ginpahayag nga may yara na sang standby fund ang barangay nga magamit sa tion nga magdeklara sang state of calamity.
Dugang pa sini, nagpreparar man ang barangay sang mga suludlan sang tubig, lakip na ang pagpa-install sang duha ka water tanks sa ila bag-o nga barangay hall agud may yara sang reserba nga tubig nga magamit sang mga pumuluyo kon kinahanglanon.
Suno kay Batuampo, may yara man sila sang koordinasyon sa Roxas City Disaster Risk Reduction and Management Office paagi sa ila group chat agud madasig nga maipahibalo ang sitwasyon sang barangay kag makapangayo sang nagakaigo nga bulig kon kinahanglanon.
Pahayag pa niya, nagpatigayon man ang barangay sang assembly agud pahanumduman ang mga pumuluyo nga magtipid sa paggamit sang tubig. Ginapanugyan man sa ila nga i-reuse ang tubig halin sa pagpanglaba ukon pagpanghugas kag magtipon sang tubig sa mga wala na ginagamit nga botelya kag iban pa nga suludlan.
Sa karon, ginapangabay ni Batuampo ang tanan nga pumuluyo sang Barangay Dayao nga mangin responsable sa paggamit sang tubig kag likawan ang pag-usik sini.
Ginapahanumdom man niya ang mga residente nga magtipon sang reserba nga tubig sa ila tagsa ka panimalay agud may magamit sa tion sang kakulangon sang suplay, sunog ukon iban pa nga emerhensya.
REPORTED BY: BOMBO ELJIE PLACIDO
