CAPIZ-Nagbaton liwat sang libre nga 10-kilo nga bugas ang nilibo ka mga pumuluyo halin sa 17 ka kabarangayan sa banwa sang Pontevedra sa ikatlo nga hugna sang distribusyon sang bugas sang Gobyerno Probinsyal sang Capiz sa pagpanguna ni Governor Fredenil H. Castro, subong nga adlaw, Nobyembre 13, 2026.
Gintigayon ang distribusyon sa Mar Hall sa Barangay Poblacion Ilawod, kun sa diin nakabenepisyo ang mga mangunguma, mangingisda, miyembro sang 4Ps kag iban pa nga mga pumuluyo nga nagakinahanglan sang bulig, taliwala sang padayon nga pagsaka sang presyo sang mga balaklon kag adlaw-adlaw nga kinahanglanon.
Nalakip sa mga nakabaton sang bugas ang mga pumuluyo halin sa Poblacion Ilawod, Poblacion Ilaya, Agbanog, Agdalipe, Ameligan, Bailan, Bantigue, Cabugao, Gabuc, Guba, Linampongan, Malag-it, Manapao, Solo, Sublangon, Tabuc kag Tacas.
Ginalauman nga makabulig ang libre nga bugas sa pagpaiban sang gastuhon sang mga pamilya, labi na sa tunga sang pagsaka sang presyo sang mga panguna nga kinahanglanon bangud sa epekto sang krisis sa enerhiya kag gatong.
Kabahin ini sang padayon nga programa sang Gobyerno Probinsyal sang Capiz, paagi sa Provincial Social Welfare and Development Office (PSWDO) kag Task Force Pagdumdum, agud mahatagan sang direkta nga bulig ang mga komunidad kag pumuluyo nga nagakinahanglan sini.
