Kapulisan, nagpanawagan sa mga biktima sang bullying nga gilayon nga i-report ini sa mga otoridad agud nga mahatagan sang naga-igo nga tikang

Nagpanawagan ang kapulisan sa mga estudyante nga biktima sang bullying nga gilayon nga i-report ini sa mga otoridad ukon responsable nga persona sa eskwelahan agud masolusyunan.

Sa interview sang Bombo Radyo kay Police Major Rey C. Dordas, Officer-in-Charge sang Dao Municipal Police Station, iya ginpahayag nga indi dapat pagbalewalaon ang mga insidente sang bullying agud malikawan nga maglala pa ini.

Suno kay Dordas, importante man nga tudluan ang mga kabataan sang disiplina kag respeto sa ila mga kaupdanan, ginikanan, manunudlo kag iban pa nga awtoridad.

Ginpahanumdom man niya ang mga estudyante nga mangin alerto sa ila palibot kag ipahibalo gilayon sa mga awtoridad sa eskwelahan ang bisan ano nga kahimtangan nga nagapaduda sa ila.